Sintese en karakterisering van N-alkielaminosuurderivate met ‘n fokus op Guerbet-tipe variante: Vordering met die vervaardiging van potensiële, volhoubare surfaktante

Synthesis and characterisation of N-alkylamino acid derivatives with a focus on Guerbet-type variants: Progress in the production of potential, sustainable surfactants

Abstract

In die afgelope dekade word aminosuursurfaktante al hoe meer in verskeie nywerhede as omgewingsvriendelike formuleringsbymiddels gebruik. Surfaktante word veral in die landbou-, kosmetiese, farmaseutiese en voedselnywerheid gebruik om die oplosbaarheid en stabiliteit van ’n aktiewe bestanddeel te verhoog. Daar is egter min navorsing oor die sintese van suuragtige N-alkielaminosuursurfaktante uitgevoer. Die sintese en toepassing van Guerbet-tipe aminosuursurfaktante is, sover ons kennis strek, nog nie ondersoek nie. In hierdie studie is daar van twee verskillende sinteseroetes gebruik gemaak om dertien verskillende N-alkielverbindings te sintetiseer. Die sintese van drie lineêre N-alkieliminodiasynderivate en tien eiesoortige Guerbettipe N-alkielaminosuurverbindings is suksesvol uitgevoer. Die sintese van hierdie unieke verbindings is met hoë suiwerheid en opbrengste groter as 90% uitgevoer. KMR-opklaring van die potensiële surfaktante en hul uitgangstowwe word breedvoerig bespreek. Grant-Paul-parameters is vir die α-, β- en γ-koolstowwe van die N-alkielverbindings bereken. Dié parameters kan in die toekoms gebruik word om voorspellings oor die ¹³C-KMR-verskuiwings van soortgelyke aminosuurderivate te maak. Verder is die verband tussen KMR-resolusie, monsterkonsentrasies en surfaktantaggregasie bespreek. Die sintese en karakterisering van aminosuursurfaktante is belangrik aangesien hulle gespesialiseerde, onbekende surfaktante is.